वीरगंज । जनकपुर उपमहानगरपालिका–२३ मा रहेको हाेटल एसपी एण्ड गेष्ठ हाउसमा एक व्यक्तिको छुरा प्रहार गरि हत्या भएको छ । जिल्ला प्रहरी कार्यालय धनुषाका अनुसार मृतक महोत्तरी गाउँपालिका–१, पर्सा टोल निवासी ३२ वर्षीय विमलेश यादव हुन् ।
उनी साउन ३ गते राति करिब ९:५० बजे केटिएम मोटरसाइकल (बा.४५प ४५८६) मा अभियुक्तसँगै उक्त होटलमा प्रवेश गरेका थिए । होटलको कोठा नं. १०२ मा बसेका बेला राति करिब २:५७ बजे विमलेश यादव नग्न अवस्थामा रगताम्य अवस्थामा पहिलो तलाबाट खसेको सिसि टिभि फुटेजमा देखिएको प्रहरीले जनाएकाे छ ।
प्रहरीका अनुसार अभियुक्तले होटलको नाम प्रविष्ट गर्दा आफ्नो नाम ‘शनि यादव’ लेखाएकी थिइन् । घटना लगत्तै जुली झा राति ३:०४ बजे भुइँतलाबाट भाग्दै गरेको दृश्य होटलको सिसि टिभिमा देखिएको थियो ।
घटनाको अनुसन्धान गर्दै गएको प्रहरीले उनलाई सोही दिन मध्यान्ह १२:०० बजे महोत्तरीको परौलतर्फ भाग्दै गरेको अवस्थामा पक्राउ गरेको जनाएको छ ।
घाइते विमलेशलाई तत्काल प्रादेशिक अस्पताल जनकपुर ल्याइएको भए पनि बिहान ७:४५ बजे उपचारका क्रममा उनको मृत्यु भएको थियो । प्रहरीले मृतकको मोबाइल फोन र होटलको निगरानी क्यामेरा फुटेजका आधारमा घटनाको अनुसन्धानलाई अगाडि बढाएको जिल्ला प्रहरी कार्यालय धनुषाका प्रवक्ता प्रहरी नायव उपरीक्षक वरुण बहादुर सिंहले जानकारी दिए ।