वीरगंज । पर्साको पोखरिया नगरपालिकाको आयुर्वेद स्वास्थ्य संस्थामा सेवाग्राहीले सेवा नपाएको व्यापक जन गुनासो आईरहेको छ । जिल्लाकै सबैभन्दा पुरानो आयुर्वेद स्वास्थ्य संस्थामा रानीगंज आयुर्वेद संस्था पर्दछ ।
कुनै समय सेवाग्राहीको व्यापक भिड लाग्ने रानीगंज आयुर्वेद स्वास्थ्य संस्था अहिले भूत बंगलाजस्तै बनेको छ । क्यौं पटक सेवा लिन गएका स्थानीय त्यहाँ प्राविधिक कर्मचारी नभेटिने र कार्यालय सहयोगी मात्र भेटिने गुनासो गर्दछन् । नेपाल सरकारले तोकेका सेवासमेत त्यस संस्थाबाट प्रवाह नहुने गरेको जनगुनासो छ । संस्था प्रमुख रामेश्वर साह र प्राविधिक ब्रजेश झा त्यस संस्थामा कार्यरत रहेपनि हप्तामा एक÷दुई दिन मात्र आउने स्थानीय बताउँछन् ।
यस विषयमा पोखरिया नगरपालिकामा सम्पर्क गर्दा आयुर्वेद शाखा हेर्ने राबिन्द्र कुमार यादवले आफू बैरिया विर्ता आयुर्वेद संस्था हेर्ने र यहाँ जनतालाई जिल्लाभरीकै संस्था मध्ये प्रभावकारी रुपमा सेवा प्रवाह गरेको बताउँछन् । पर्सा जिल्ला भित्र रहेको संस्थामध्ये बैरिया बिर्ता आयुर्वेद संस्था सेवा प्रवाहमा अग्रपंक्तिमा रहेको दाबी गर्दै यादवले रानीगंज संस्थाबारे कमीकमजोरी रहेको स्वीकार्छन् ।
आफूले रानीगंज संस्थामा सेवा प्रवाह नगर्ने र त्यहाँका कर्मचारीलाई कारबाही समेत गर्न नमिल्ने बताउँदै यादवले यो विषयमा नगरपालिकाले नै निगरानी गर्नु पर्ने बताए । उनले रानीगंजका स्थानीय समेत बैरियाको संस्थामा सेवा लिन आउन गरेको बताए ।
यस विषयमा रानीगंजका संस्था प्रमुखलाई रामिश्वर साहसंग फोन सम्पर्क गर्न खोज्दा मोबाईल स्वीच अफ रहेको पाईयो ।