HamroNepalDainik.com
समाचार

कलैयामा सोमवारदेखि भौतिकरूपमा कक्षा सञ्चालन

प्रस, वीरगंज, १७ साउन/

कलैया उपमहानगरपालिकामा रहेका सबै तहका कक्षा सोमवारदेखि सञ्चालनमा आउने भएको छ ।

कलैया उपमहानगरपालिकाका उपसचिव प्रह्लादप्रसाद वर्णवालले आधारभूत तहका १ देखि ८ कक्षामध्ये ४ देखि ८ र मावि तहका ९ देखि १२ सम्मको कक्षा विद्यार्थीहरूको भौतिक उपस्थितिमा पठनपाठन गर्न पाउने निर्णय भएको हुँदा सोही अनुरूप सञ्चालन गर्न निर्देशन गरेका छन् ।

नगर कक्षा समितिको साउन १५ गते बसेको बैठकले यी कक्षाहरू भौतिकरूपमा विद्यार्थीहरू उपस्थित गराएर सञ्चालन गर्न निर्णय गरेअनुरूप उपमहानगरपालिकामा रहेका सामुदायिक तथा संस्थागत विद्यालयहरूलाई सञ्चालन गर्न निर्देशन गरिएको छ । विद्यालय सञ्चालन गर्दा कम्पाउन्ड, कक्षा कोठा, शौचालय, प्रयोगशाला विसङ्क्रमित गर्नुपर्ने, शिक्षक–विद्यार्थीहरूले स्वास्थ्यसम्बन्धी मापदण्ड पालना गर्नुपर्ने, एउटा बेन्चमा एकजना मात्र राख्नुपर्ने र सोअनुरूप कक्षा सञ्चालनमा डेस्क–बेन्चको कमी नभएको खण्डमा सिफ्ट अनुसार कक्षा सञ्चालन गर्ने र घरमा भएका विद्यार्थीहरूको लागि टेलिफोन, अनलाइन, भिडियो कन्फ्रेन्समार्फत अथवा विद्यार्थीहरूको घरमा गई सिकाइ सहजीकरण, गृहकार्य दिने निर्देशन गरिएको छ ।

बारा जिल्लामा सबै तहका विद्यालयहरू सञ्चालनमा आए पनि पर्सा जिल्लामा अहिलेसम्म विद्यालय सञ्चालन हुन सकेको छैन । वैशाख १६ गतेदेखि शुरू भएको निषेधाज्ञा अनिश्चितकालको लागि जारी भएको छ । तर केही विद्यालय भने निषेधाज्ञामा पनि विनापोशाक सञ्चालन भइरहेका छन् । वीरगंज महानगरपालिकाले असार १ गतेदेखि कक्षा ८ देखि १२ सम्म भौतिकरूपमा सञ्चालनको निर्देशन गरे पनि जिल्ला सङ्कट व्यवस्थापन समितिले यससम्बन्धी निर्णय नगरेको कारण अहिलेसम्म आधिकारिकरूपमा सञ्चालनमा आउन सकेका छैनन् । तर महानगरका थुप्रै संस्थागत विद्यालय भने यो अवधिमा विनापोशाक भौतिकरूपमा विद्यार्थीहरू राखेर सञ्चालन भइरहेका छन् ।

Related posts

जनगणना कार्य तीब्र, जातीय आधारमा भाषा सूचिकृत गरिदै

hamronepaldainik

कांग्रेसले बोलायो केन्द्रीय कार्यसम्पादन समितिको बैठक

hamronepaldainik

समाजवादी प्रेस संगठन नेपाल, पर्साको प्रथम जिल्ला अधिवेशन सम्पन्न

hamronepaldainik
HamroNepalDainik