तलब नपाएको भन्दै निजी विद्यालयका शिक्षकले महानगर प्रमुखलाई बुझाए ज्ञापन

वीरगञ्ज, २८ चैत
विद्यार्थीहरुको शूल्क उठाउन माग गर्दै वीरगञ्जका विभिन्न संस्थागत विद्यालयका शिक्षकहरुले महानगरमा ज्ञापन पत्र बुझाएका छन् । वीरगञ्जस्थित ज्ञानदा एकेडेमी, गौतम मावि, जिएचपी मावि र एञ्जल इन्टरनेशनल सेकेण्डरी स्कुलका शिक्षकहरुले वीरगञ्ज महानगरपालिकाका प्रमुख राजेशमान सिंहलाई ज्ञापन पत्र बुझाउँदै बाँकी रहेको शूल्क उठाइदिन माग गरेका हुन् ।
भर्खरै सम्पन्न अन्तिम परीक्षाको बेला पनि वीरगञ्ज महानगरकै निर्देशनमा शूल्क नबुझाउनेलाई पनि परीक्षाबाट बञ्चित नगराइएको हुँदा बाँकी शूल्क महानगरले नै पहल गरेर उठाउनुपर्ने शिक्षकहरुको माग छ ।
दुई महिनादेखिको पारिश्रमिक नपाएको दुखेसो पोख्दै शिक्षकहरुले तलब माग्दा अभिभावकले नै शूल्क नदिएको व्यवस्थापन पक्षले प्रतिक्रिया दिएको हुँदा महानगरलाई गुहार्न बाध्य भएको शिक्षकहरुको भनाई छ ।
अधिकांश अभिभावकले शूल्क नबुझाएको र बुझाउनेलाई पनि केही अभिभावकले रोक्दा आफुहरुले पारिश्रमिक पाउन नसकेको उनीहरुको दुखेसो छ । संस्थागत विद्यालयको आम्दानीको मूल स्रोत नै शूल्क भएको हुँदा अभिभावकले नबुझाएपछि त्यसको प्रत्यक्ष प्रभाव शिक्षकहरुलाई परेको उनीहरुले बुझाएको ज्ञापन पत्रमा उल्लेख छ ।
विद्यालयबाट पटकपटक अनुरोध गर्दा पनि शूल्क बुझाउन आलटाल हुँदै आएको हुँदा शिक्षक कर्मचारीलाई मासिक पारिश्रमिक उपलब्ध गराउन विद्यालय असमर्थ रहेकोले बक्यौता शूल्क बुझाउनका लागि सहयोग र आवश्यक समन्वय गरिदिन ज्ञापन पत्रमार्फत उनीहरुले महानगर प्रमुख सिंहलाई अनुरोध गरेका छन् ।
ज्ञापन पत्र बुझ्दै महानगर प्रमुख सिंहले ज्ञानको ज्योती दिने शिक्षकहरु नै समस्यामा परेपछि शैक्षिक क्षेत्रको सुधार हुन नसक्ने बताए । विद्यालयलाई तिर्नुपर्ने शूल्कका सम्बन्धमा सबै विद्यालयका व्यवस्थापन समिति र अभिभावकसँग छलफल गरेर समस्या सुल्झाउने महानगर प्रमुख सिंहले आश्वासन दिएका छन् । शिक्षाको सवालमा आफु गम्भिर रहेको बताउँदै उनले शिक्षकहरुको समस्यालाई गम्भिर रुपमा लिएको बताए ।