३० वैशाख, मोरङ । गृहमन्त्री रमेश लेखकले नेपाल राष्ट्र बैंकको गभर्नर चाँडै नियुक्त हुने बताएका छन् । गभर्नर अवकाशमा जानु एक महिना पहिले नै नियुक्त गरिसक्नुपर्नेमा राष्ट्र बैंकको नेतृत्व कायम मुकायम गभर्नरले गरेको अवस्थामा पनि गृहमन्त्री लेखकले चाँडै नियुक्त हुने बताएका हुन् । विराटनगर विमानस्थलमा मंगलबार सञ्चारकर्मीहरूसँग कुराकानी गर्दै गृहमन्त्री लेखकले कांग्रेस र एमालेबीच सहमतिका आधारमा गभर्नर चाँडै नियुक्त हुने दाबी गरेका हुन् ।
गृहमन्त्री लेखकले मुलुकमा राजनीतिक स्थिरता एवं आर्थिक समृद्धिका लागि एमाले र कांग्रेसबीच सहमतिका आधारमा निर्माण भएको गठबन्धनको सरकार पूर्ण कार्यकालसम्म सञ्चालन हुने दाबी गरेका थिए ।
वर्तमान सरकार जनतामा छाएको निराशालाई चिरेर आशाको किरण दिन गठन भएको उनले बताइ । गृहमन्त्री लेखकले संविधान र वर्तमान व्यवस्थाविरूद्ध राजावादीका कुनै पनि गतिविधि सह्य नहुने स्पष्ट पारेका थिए । नेपाली जनताको ठूलो संघर्ष, त्याग एवं बलिदानबाट आएको संघीय लोकतान्त्रिक गणतन्त्रको विकल्पमा अन्य कुनै निरंकुश व्यवस्था व्यवस्था हुन नसक्ने उनले बताए ।
गृहमन्त्री लेखकले वर्तमान सरकारले १० महिनामा गरेको उपलब्धिहरूको प्रशंसा गर्दै आर्थिक सूचकांक र अर्थतन्त्र सवलीकरणतर्फ अगाडि बढिरहेको बताए ।